കൊച്ചി: തലശേരി ഫസല് വധക്കേസില് നിര്ണായക തെളിവായ രക്തം പുരണ്ട തൂവാല കോടതിയില്നിന്നു കാണാതാകുകയും തിരിച്ചുകിട്ടുകയും ചെയ്ത സംഭവത്തില് സമഗ്ര അന്വേഷണം നടത്താന് എറണാകുളം ചീഫ് ജുഡീഷല് മജിസ്ട്രേറ്റ് കോടതിക്കു സിബിഐ പ്രത്യേക കോടതിയുടെ നിര്ദേശം.
കാണാതായ തൊണ്ടിമുതല് തിരിച്ചുകിട്ടിയതായി അറിയിച്ചതു രേഖപ്പെടുത്തിയശേഷമാണ് കൊച്ചിയിലെ സിബിഐ കോടതി അന്വേഷണത്തിനു നിര്ദേശിച്ചത്. സിബിഐ പ്രത്യേക കോടതിയില് വിചാരണ പുരോഗമിക്കവെ സിജെഎം കോടതിയില്നിന്നാണ് തൂവാല നേരത്തേ കാണാതായത്. തൊണ്ടിമുതല് ഹാജരാക്കാന് സിബിഐ ആവശ്യപ്പെട്ടിരുന്നു. ഈ നിര്ദേശപ്രകാരം എറണാകുളം സിജെഎം കോടതിയില്നിന്നു സിബിഐ കോടതിയില് എത്തിച്ച കവര് തുറന്നപ്പോള് അതില് തൂവാല ഉണ്ടായിരുന്നില്ല.
പകരം തൂവാല എലി കരണ്ടുപോയതാകാമെന്ന കുറിപ്പായിരുന്നു ഉണ്ടായിരുന്നത്. തുടര്ന്ന് ഇതുസംബന്ധിച്ച് അന്വേഷിച്ചു റിപ്പോര്ട്ട് സമര്പ്പിക്കാന് സിജെഎം കോടതിയോട് ആവശ്യപ്പെട്ടിരുന്നു.ഈ റിപ്പോര്ട്ട് വരാനിരിക്കെയാണ് തൂവാല വിശദമായ തെരച്ചിലില് മറ്റൊരിടത്തുനിന്ന് കണ്ടെത്തിയത്.
എന്ഡിഎഫ് പ്രവര്ത്തകനായിരുന്ന തലശേരി ഒളിയിലക്കണ്ടി മുഹമ്മദ് ഫസലിനെ 2006 ഒക്ടോബര് 22ന് പുലര്ച്ചെയാണു ജഗന്നാഥ ക്ഷേത്രത്തിനു സമീപം ഒരു സംഘം വെട്ടിക്കൊലപ്പെടുത്തിയത്. വിചാരണനടപടികള് പുനരാരംഭിച്ച കേസില് ഇന്നലെ ഫസലിന്റെ ഭാര്യ മറിയുവിന്റെ വിസ്താരം പൂര്ത്തിയായി. നാളെ സഹോദരിയെ വിസ്തരിക്കും.
Deepika
E-paper LOGIN
LOGIN
